Армения Ұжымдық қауіпсіздік шарты ұйымына мүшелігін уақытша тоқтатып қойды.
ТАСС агенттігінің жазуынша, бұл жайында Армения премьер-министрі Никол Пашинян France 24 телеарнасына берген сұхбатында айтқан.
«Біздің пайымдауымызша, ұжымдық қауіпсіздік шарты Армениямен байланысты мәселелерде орындалған жоқ. Әсіресе 2021-2022 жылдары бұл жайт біздің назарымыздан тыс қала алмады. Біз аталмыш шартқа мүшелігімізді тоқтатып қойдық. Әрі қарай не боларын көреміз», - деді Армения басшысы.
Арменияның солтүстігіндегі Гүмриде Мәскеу мен Ереванның 1995 жылғы мемлекетаралық шарты бойынша 102-ші ресейлік әскери базасы орналастырылған. Ол ТМД әуе қорғанысының біріккен жүйесі шеңберінде жауынгерлік кезекшілікті атқарады. 2010 жылы тараптар шарттың қолданылу мерзімін 2044 жылға дейін ұзартқан.
Ақпан айының басында The Daily Telegraph газетіне берген сұхбатында Пашинян Арменияның ҰҚШҰ-ға мүшелігін қайта қарастыруы мүмкін екенін мәлімдеді. 2023 жылы ел ұйым шеңберіндегі бірқатар іс-шараға, атап айтқанда қараша айында Минскіде өткен екі оқу-жаттығуға және саммитке қатысқан жоқ. Кремль бұл мәселеге өкінішін білдірді. Ереван ұйымнан кетуді әзірге жоспарламайтынын атап өтті.
