ҚАЗАҚ ЗИЯЛЫЛАРЫНА (Босқын қырғыз-қазаққа жәрдем)
Босқын қырғыз-қазақтардың жәрдемге қандай мұқтаж екендігі өзгеден бұрын зиялыларға белгілі. Жалпы жұрт қолдан келген көмегін аямас. Жұртқа басшылық ету үшін һәм босқын қырғыз-қазақтарға жәрдемімізді күшейту үшін, мәслихат көрсеңіздер, мынадай жол айтқымыз келеді.
Мал бағып, тіршілік еткен қара шаруадан басқа оқыған зиялылар аз емес. Бұлардың бәрі де айлап белгілі жалование алады, мысалы - қазіргі толып жатқан ұлылы-кішілі комитет яки управа ағзалары, комиссарлар, милитсия бастықтары, шенеуніктер, ушителдер, мұғалімдер, қазилер, мұһтасиптер, моллалар, газетшілер, инструкторлар, приказшылар, конторшиктер, докторлар, фелдшерлер, судиялар, адвокаттар, тағы-тағылар.
Міні бүкіл қазақ зиялылары болып, айында алатын жалованиіелерінің 5 %-ын яки сомына 5 тиыннан босқын қырғыз-қазақтар пайдасына беріп отыратын болсақ, көп ақша жиылар деп ойлаймыз.
«Берушіге бесеу көп» деген мақал болса, 5 тиын ауыр болмаса керек. Осы хатқа қол қойғандар ноябір айынан бастап жалованиеміздің 5%-ын "Қазақ" басқармасына тапсырып отырамыз.
Ғали хан, Миряғқұб, Ахмет Бірімжанов,
Ахмет Байтұрсынов, Жанұзақ Жәнібеков,
Елдес Омаров, Файзолла Ғалымжанов,
Ахмед Мәметов, Бірмұхамед Сейсекенов,
Есен Тұрмұхамедов, Хамид Жүндібаев,
Шәкіржан Мұхамедшәріпов.
«Қазақ» газеті, №2509, 1917 жыл. Орынбор қаласы
Дереккөз: Бөкейхан Ә. Шығармалары. X том.-Астана, 2018
Alash.kz ұлттық порталы
