Президент Қасым-Жомарт Тоқаев Қазақстанға Шанхай Ынтымақтастық Ұйымының (ШЫҰ) саммитіне келген БҰҰ Бас хатшысы Антониу Гутерришпен келіссөздер жүргізді. Тараптар Қазақстан мен БҰҰ арасындағы ынтымақтастықтың басым бағыттарын, сондай-ақ халықаралық күн тәртібіндегі өзекті мәселелерді талқылады. Бұл туралы Alash.kz ұлттық порталы хабарлайды.
Сіздің Астанаға сапарыңыз және ШЫҰ саммитіне қатысуыңыз Қазақстан мен БҰҰ арасындағы тығыз өзара іс-қимылдың жарқын символы болып табылады. Бұл біздің БҰҰ қызметіне қатысуымызды көрсетеді. Қазақстан және мемлекет басшысы ретінде мен БҰҰ қызметін қазіргі күрделі жағдайда толықтай қолдаймыз, - деді президент.
Антониу Гутерриш өз кезегінде Астананың ШЫҰ-ға төрағалығын жоғары бағалады. Ол Қазақстанда жүргізіліп жатқан ауқымды саяси және экономикалық реформаларға қолдау білдіріп, еліміздің жаһандық қауіпсіздік пен бейбітшілікті қамтамасыз етудегі маңызды рөлін атап өтті.
- Қазақстан бейбітшілік үшін дәйекті күрестің жарқын үлгісі болып табылады. Сіздің еліңіз әрқашан "көпір салушы", бейбітшілік елшісі, бірігу ісінде, соның ішінде аса қиын жағдайларда делдал болды. Астана көптеген бітімгершілік бастамалардың орталығы болып табылады, олардың арасында Сирия бойынша Астана процесі де бар. Астана әрқашан әлем үшін тұғырнама болды, Қазақстан орасан зор моральдық беделге ие. Сіз ядролық қарусыздану саласындағы көшбасшысыз және көптеген басқа салаларда бейбітшілікке деген адалдығыңызды көрсеттіңіз, – деді БҰҰ Бас хатшысы.
