Республика күні қарсаңында президент жарлығымен Лидия Каденова “ҚР Халық әртісі” атағына ие болды, деп хабарлайды Alash.kz ұлттық порталы.
Бұл туралы актриса өзі инстаграм парақшасына бөліскен еді.
«Жарлық шықты. Бірақ әлі қолға алғам жоқ. Кеудеме тағылсын, содан кейін көреміз деп ойлағам. Сендер менің жанкүйерлерімнің бірісіңдер. Таңертеңнен бір жылап, бір күліп жүрмін. Менің қатарластарым көп қой. Ала алмай кеткендер де бар. Бүгін бұрынғы Қазақстанның ауыл-ауылында колхоз-совхоз жастығы өткен, айлап-жылдап гастрөлде жүрген апалар, солар есіме түсті. Бұл атаққа 2000 жылдары ұсынған. Ол кезде болмай қалды. Бұйырған күні осы боп тұр ғой. Халықтың танығаны бар, танымағаны бар, бәрі жазып жатыр. «Ура, ура қуанып жатырмыз», «Осындай ардагер адамдардың еңбегі бағалану керек қой» деп. Міне, халқым қуанып, балаларым қуанып, туысқандарым, өздерің сияқты достарым қуанып жатса, одан артық не керек» – дейді Лидия Каденова.
Лидия Каденованың ұлы Дидар Каденов инстаграм парақшасына анасының медаль алып жатқан видеосын жүктеді. Видеода Лидия апайымыздың таңғажайып эмоциясын халық та бірден байқады.
