Экс-мәжіліс спикері Нұрлан Нығматулиннің үлкен ұлы Нұржан Нұрлановның үстінен рейдерлік жасады деген айып бойынша қылмыстық іс қозғалды. Бұл туралы ҚазТАГ ақпарат агенттігі хабарлады, деп жазады Alash.kz ұлттық порталы.
"Сұрауда көрсетілген факті бойынша Алматы қаласы полиция департаментінің тергеу басқармасы ҚР ҚК-нің 389-бабы (өз бетінше билік ету) бойынша сотқа дейінгі тергеу жүргізіп жатыр. Қазіргі уақытта іс бойынша жан-жақты, толық әрі объективті тергеу амалдары жүргізілуде", – деп мәлімдеді ҚР Ішкі істер министрлігі сейсенбі күні ҚазТАГ редакциясының сұранысына жауап ретінде.
Бизнесмен Қанат Амиркин Нұржан Нұрланов "Алатаудорстрой" компаниясын тартып алып, ірі көлемде ақша талап еткенін айтқан.
"Тергеу жүріп жатыр. Компанияны қайта рәсімдеу фактісі бойынша әзірге «Өз бетінше билік ету» бабы қолданылды. Бірақ менің ойымша, бұл іс рейдерлікке қайта сараланып, «Алатаудорстрой» компаниясы мен Үлкен Алматы айналма жолы (ВОАД) бойындағы жер учаскесін заңсыз тартып алу бойынша алаяқтық бабы қосылуы мүмкін", – деді Амиркин ҚазТАГ-қа берген сұхбатында.
Айта кетейік, Нұржан Нұрланов 2019 жылдың ақпан айынан 2022 жылғы қаңтар оқиғасына дейін "ҚазМұнайГаз-Аэро" ЖШС-нің бас директоры болған. Оған дейін, 2018 жылдың қаңтарынан бастап, "Бәйтерек" ұлттық басқарушы холдингі басқармасының мүшесі қызметін атқарған. Бұған қоса, ол Қазақстанның квазимемлекеттік секторында бірқатар маңызды қызметтерді атқарған.
