Математик Асқар Жұмаділдаев "Түркістан" газетіне берген сұхбатында ғылым қуып шетелге кетіп жатқан жастар туралы айтыпты.
Ғалымның айтуынша, әлемнің екінші ұстазы атанған әл-Фараби Отырарда туған. Бірақ бала кезінен білім, ғылым іздеп Таяу Шығыс елдеріне аттанған. Ғұлама ғалым телегей теңіз білімді Бағдат қаласындағы Ғылым академиясынан алды. Ол өз Отанына оралды ма? Жоқ. Өйткені ол өз дәуірінің ең көрнекті ғалымдарымен танысты, тәлім-тәрбие алады. Алаңсыз ізденіп, кітап жазды, дейді.
"Сондықтан мен шетелге кеткен ғалымдарды кінәлай алмаймын. Олар шетелге көңіл көтеруге, қызық қууға бармайды, білім-ғылым іздеп жолға шығады. Біз елімізде олардың жұмыс істеуіне жағдай жасай алмасақ, ең болмағанда жолын байламайық. Шетел шақырса, бағаласа, мүмкіндік берсе, бара берсін" депті математик.
Шынын айту керек, соңғы жылдары шетелге әртүрлі себеппен қоныс аударып жатқан жастар көп. Оның ішінде тіршілік үшін жұмыс іздеп кеткендер де, білім қуып кеткен ғалымдар да баршылық. Оларды Қазақстанға қалдыру үшін не жасауымыз керек? Бұл сұраққа да ғалымның өз уәжі бар.
"Ал білімді жастардың өз Отанына қызмет еткенін қалайтын жұрт оларға жақсы жағдай жасауы керек. Жағдай жасалса, жастар ешқайда кетпейді. Жоғары жалақы төлеп, зертханалық тәжірибе жұмыстарын жасауға арналған құрал-жабдықтармен қамтамасыз етсе, кеткендер елге қайта оралады. Мәселен, балаға мал бақтыру үшін оның астына ат, қолына таяқ не иығына мылтық беруің керек. Ғылымды дамытатын жастарға да осылай барымызды беріп, жағдай жасауымыз керек - дейді Жұмаділдаев.
