Мемлекет басшысынан бастап халықпен кездесулер өткізіп, осы жылғы жоспарларымен танысып, өткен жылы шешімін тапқан игі шаралар сарапқа салынады. Дәстүрге айналған осындай кездесулердің бірінде көпшіліктің өтінішіне сәйкес Алматы қаласының әкімі Ерболат Досаев аудан әкімдерінің көп балалы аналармен ай сайынғы кездесулерін ұйымдастыруды тапсырған болатын. Бұл игі дәстүр көп балалы аналарымызды ерекше қуантты.
Осы қала әкімінің тапсырмасына орай қаламыздағы көп балалы аналардың аудан әкімдерімен кездесуі әдетке айналуда. Мәселен осы ақпан айында алматылық аудан әкімдері көп балалы аналармен сегіз кездесу өткізген. Әкіммен кездесуге тоқсан көп балалы ана келіп, әкімдер олардың жүзден астам сұрағына жауап берген.
Аналарымыздың арасында мәселесін айтып, шешіп беруді өтінгендері де жоқ емес. Осындай аналар тарапынан айтылған он шақты мәселе оң шешімін тапқан.
Негізі аналар тарапынан айтылатын мәселенің көбісі тұрғын үй алу тәртібіне, халықты баспаналы ететін мемлекеттік бағдарламаларға және балаларды балабақшаларға орналастыруға қатысты, Artsport бағдарламасы туралы болған. Көп балалы аналардың көбіне не көп мазалайтынын осы қойылған сұрақтарға қарап бағамдауға болатын секілді. Алдағы уақытта да көп балалы аналармен кездесу жалғасын таба бермек.
Еркенұр Қонысбай
