Кездесуге облыстық дене шынықтыру және спорт басқармасы басшысының міндетін атқарушы Жеңіс Нығметуллин, байдарка мен каноэ есуден облыс құрама командасының жаттықтырушысы, Марияның анасы Елена Бровкова да қатысып отырды.
-Сізді жоғары спорттық жетістігіңізбен, яғни Италияда өткен әлем чемпионатында жеңімпаз атануыңызбен шын жүректен құттықтаймын. Бұл тек спортшының ғана емес, сонымен қатар бүкіл жаттықтырушылар штабының, байдарка және каноэ есу федерациясының ортақ жеңісі деп білемін. Алда аса маңызды мақсат – 2024 жылы Франция елінде өтетін ХХХІІІ жазғы Олимпиада ойындарына жолдама алу үшін тартысты жарыстар күтіп тұр. Осы мақсатқа қол жеткізу үшін бар күш-жігеріңді салады деп сенемін, - дей келе өңір басшысы Нариман Төреғалиев М.Бровковаға алғыс хат пен қаржылай сертификат ұсынды.
Айта кетейік, 2023 жылдың 7-9 шілдесі аралығында Италияның Ауронцо-ди-Кадори қаласында байдарка мен каноэ есуден жасөспірімдер мен жастар арасында әлем чемпионаты өткен болатын. Чемпионатқа 65 мемлекеттен 938 спортшы қатысты. Аталған жарыста батысқазақстандық ескекші 1 алтын, 1 күміс, 1 қола медальды жеңіп алды. Мария 1000 метр қашықтықта әлем чемпионы атанса, 500 метр қашықтықта қола жүлде, 200 метрде күміс жүлде иегері атанды.
Мария Бровкова 2005 жылдың 31 қаңтарында туған. Батыс Қазақстан облысының Круглоозерный ауылында тұрады. 2022 жылы Олимпиада резервінің облыстық мамандандырылған мектеп-интернат-колледжін бітірді. 2017 жылдан БҚО құрама командасының мүшесі.
2018-2022 жж. Қазақстан Республикасы чемпионаттарының жеңімпазы және жүлдегері.
2021 жылы Братислава (Словакия) қаласында өткен Халықаралық регатаның жеңімпазы.
2022 жылдың наурыз айында Таиландта өткен Азия чемпионатының күміс жүлдегері.
2022 жылдың қыркүйек айында Сегед (Венгрия) қаласында өткен әлем чемпионатының жеңімпазы және қола жүлдегері.
2023 жылдың мамыр айында Сегед (Венгрия ) қаласында өткен Әлем Кубогының жеңімпазы.
Жаттықтырушысы, өзінің анасы Елена Бровкова. Еленаның дайындаған үздік спортшылары: Рабаев Азамат, Глазков Владислав, Донскова Наталья, Бровкова Мария – бәрі де ҚР спорт шеберлері, Азия, ҚР чемпионаттарының жүлдегерлері. Мария – жастар арасында екі мәрте әлем чемпионы.
