Қостанай облысы, Лисаков қаласында ер адам әйелінің ұлын аяусыз ұрып-соққан. Таяқтаудан көз ашпаған бала мектепке барудан қалған, сабаққа қатыспайтын болған. Бұған жағдай мұғалімдерді алаңдатқан, деп хабарлайды Alash.KZ.
Алты жасар ұлы бар әйел қайта тұрмыс құрады. Баланың өгей әкесі қаталдық танытып, оған зорлық-зомбылық көрсетеді. Ауыр әдістер арқылы дене шынықтыруға мәжбүрлеп, азаптайды. Бұл қылығына бола ер адамға айыппұл да салынған. Бірақ дәл осындай сорақы жағдай бір жылдан кейін қайталанған.
"Бала тағы да соққыға жығылды. Анасы күйеуінің кінәсі жоқ екенін және баланың өзі құлап кеткенін айтады (өткендегі жағдай секілді). Олар полицияға жеткізілді, бірақ анасы өтініш жазудан бас тартты және іс жабылды", — деді жергілікті тұрғын.
Желіде зардап шеккен баланың суреттері пайда болды. Онда баланың соққыға жығылып, денесінің қатты көгергені байқалады.
Полиция Лисаков қаласында тұратын 8 жасар балаға дене жарақатын салу фактісі бойынша сотқа дейінгі тергеу басталғанын атап өтіп, ақпаратты растады.
"Қазіргі уақытта барлық қажетті тергеу іс-шаралары, соның ішінде жауап алу және сараптама тағайындау жүріп жатыр.
Баланың басына түскен жағдай туралы қамқоршылық органдары мен мектеп өкілдері айтқан. Өйткені оқушы бала тоқсан соңындағы демалысынан кейін сабаққа оралмаған.
Оның денсаулығын қорғау үшін ювеналды полиция қызметкерлері оны арнайы әлеуметтік қызметтерге мұқтаж балаларды қолдау орталығына орналастырды", - деп хабарлады аймақ полиция департаменті.
Қазіргі уақытта бала биологиялық әкесімен бірге. Істі тергеу бақылауға алынды.
