Елена Рыбакина Париждегі Олимпиадаға қатыспайтын болды, деп хабарлайды Alash.kz ұлттық порталы.
Қазақстанның үздік теннисшісі төртжылдықтың басты жарысын жіберіп алады.
Қазақстан Теннис федерациясы елдің бірінші ракеткасының 2024 жылғы олимпиададан бас тарту себебін түсіндірді.
"Қазіргі уақытта Елена жедел бронхитпен ауырып жатыр, сондықтан дәрігерлер оған кортқа шығуға ғана емес, жарыстарға ұшып баруға да қатаң тыйым салды. Рыбакина Олимпиада ойындарына белсенді түрде дайындалып, жоғары деңгейде өнер көрсетуді жоспарлаған болатын, бірақ ауру салдарынан бұл мүмкін болмады", - деп мәлімдеді ведомствоның баспасөз қызметі.
Рыбакина жеке жарыстар тізімінен шығарылды. Сондай-ақ, Олимпиада ойындарының ресми сайтынан Рыбакина мен Александр Бублик жұбының микс категориясындағы қатысуы да есептен алынды.
Қазақстандық теннисшіні австралиялық теннисші Дарья Сэвилл (WTA рейтингінде 77-ші орын) ауыстырады.
Елена Рыбакина соңғы рет Уимблдон турнирінде ойнаған болатын. Онда әлемнің төртінші ракеткасы жартылай финалға дейін жетті.
Айта кетейік, биыл Елена асқазан-ішек жолдары мәселелеріне байланысты WTA санатындағы турнирлерден бас тартқан болатын.
