Қазақстандық қыз Камбоджа түрмесіне түсті. Қыздың төрт ай бұрын Гуанчжоудағы (Қытай) университетті бітіргені анықталды, деп хабарлайды Alash.kz ұлттық порталы Kaztoday.kz-ге сілтеп.
Оқуын аяқтағаннан кейін оған қызықты жұмыс ұсынысы түсті: алты айлық келісімшарт, айына 5000 доллар жалақы, тегін баспана, тамақ және ұшақ билеті. Алайда шындық мүлде басқаша болып шықты.
«Бастапқыда жағдай қалыпты болды, бірақ кейін жұмыс берушілер шектен шыға бастады – оған барған сайын көбірек жұмыс жүктей бастады. Ол жұмыстан кетуге шешім қабылдаған кезде, оны жібермей қойды. Паспортын тартып алды, кампустан шығуға тыйым салды. Кейін айқай мен ұрып-соғу басталды», – дейді оның құрбысы.
Төрт күн бұрын жағдай күрт нашарлады. Қыз қорлыққа шыдамай, полициядан көмек сұраған.
«Оған айқайлап, соққыға жықты. Ол қатты қорқып, паникалық шабуылға ұшырады. Бұл туралы менеджеріне хабарлады, ал HR полиция шақыртты. Бірақ көмек көрсету орнына оны қамауға алды. Ол жақта сыбайлас жемқорлық өте күшті – компания жай ғана полицияға ақша беріп, енді оны құжатсыз, байланыссыз ұстауда», – дейді құрбысы.
Оның айтуынша, қыз адам төзгісіз жағдайда отыр – жалаң еденде ұйықтауға мәжбүр, тамақ пен су бермейді.
«Полицейлер тамақ үшін ақша талап етеді, бірақ төлесең де, өз қалталарына басып алады. Соңғы 2000 батын жасырып отыр, чемодандарын ашудан қорқады – бірдеңе салып жіберуі мүмкін. Құқықтарын талап етуге де батылы бармайды, себебі ондай жағдайда оны жай ғана өлтіруі мүмкін».
Туыстары мен достары қазақстандық биліктен көмек сұрауға тырысып жатыр, бірақ әзірге нәтиже жоқ.
«Мен осы істермен айналысатын бір адамды таптым, бірақ ол маған айқайлап, тұтқаны қойып қойды. Ешкім көмектескісі келмейді!», – дейді құрбысы.
Қазақстанның Вьетнамдағы елшілігі бұл жағдай туралы білетінін және Камбоджа билігімен жұмыс істеп жатқанын растады. Алайда қыздың не үшін ұсталғаны туралы ақпарат әзірге белгісіз.
«Бұл – азаматтарымыздың шетелге жұмысқа барып, «көлеңкелі» компанияларға орналасуының классикалық мысалы. Оларға жоғары жалақы уәде етіледі, бірақ шын мәнінде не болғанын нақты айтуға әлі ерте. Ресми ақпаратты күту қажет», – деді консул.
Қыздың отбасы үлкен қаржылық қиындыққа тап болған. Ол анасына кредитін төлеуге көмектескісі келген. Ол Алматы облысындағы ауылдан шыққан, төрт тіл біледі. Сонымен қатар, жүрек ақауы бар, бұл оның жағдайын одан сайын қиындатып отыр. Жақындары оның кез келген сәтте байланысқа шықпай қалуынан және өміріне қауіп төнуінен қорқады.
