Тірі болсам, қазаққа қызмет етпей қоймаймын!

Әлихан Бөкейхан

ОРАЛДЫҚ ОҚУШЫЛАР ХАЛЫҚАРАЛЫҚ РОБОТОТЕХНИКА ЧЕМПИОНАТЫНДА ТОП ЖАРДЫ

06:40, 03 шілде 2023 176
3 шілдеде БҚО әкімінің орынбасары Бақытжан Нарымбетов «Haileybury International First Championship  –  2023» халықаралық роботтық техника чемпионатында абсолютті чемпион атанған оралдық оқушылармен кездесті. 

Аталмыш чемпионатты Алматы қаласының білім басқармасы, «Дарын» орталығы және Haileybury қазақ-британ мектебі ұйымдастырған болатын. Чемпионатта әр мемлекеттің және еліміздің үздік командалары  бақ сынасқан. Байқауға Оралдағы Оқушылар сарайынан «HighTech», «Jaiq»  командалары қатысып, нәтижесінде бес категория бойынша абсолютті чемпион атағын иеленді.

– Қазіргі заман – роботтық техниканың заманы. Ең бастысы, бұл қазіргі кезде трендтегі салалардың бірі.  Күнделікті өмірде барлық салада қолданылатын роботтық техниканың көмегімен келешекте жарқын өмір сүруге үлкен мүмкіндіктер туып отыр. Нәтижесінде балалардың кішкентай кезінен бастап креативтілігі, логикасы  мен жан-жақты ойлау қабілеті дамиды.  Өткен айда ғана оқушылар сарайында   «Сәби» қоры  28 000 000 теңгеге жаңа үлгідегі «Роботтық техника» кабинетін тарту еткен еді. Міне, нәтижесінде оқушыларымыз үлкен сайыстан жеңімпаз болып оралды,  – деп облыс әкімінің орынбасары оқушыларға сәттілік тіледі.

Топ жетекшісі Нұрбол Мұсаұлының айтуынша, халықаралық чемпионатқа бес мемлекеттен елу топ қатысқан.

– Бұдан бұрын біз  Астана қаласында өткен байқауда орталық Азия  чемпионы атанып, кешегі Алматыда  өткен халықаралық  байқауға жолдама алған болатынбыз.  Қазіргі таңда  халықаралық байқауда да ірі командаларды артқа қалдырып, абсолютті чемпион атандық. «Орал қаласының оқушылары абсолютті чемпион деген хабарды естігенде өзіміздің үлкен екенімізді ұмытып, балаша қуандық. Еңбектің ақталғаны  – үлкен жетістік, – дейді Нұрбол Мұсаұлы.

Еркін сипатта өткен кездесуде оқушылар жарыста алған әсерлерімен және алдағы жоспарларымен бөлісті. Тамыз айында Қытай елінде өтетін халықаралық байқауға шақырту алған команда үлкен додада бақ сынауға пейілді. Сондай-ақ ізденімпаз оқушылар жаңадан шыққан құрылғының қажет  екенін де жасырмады. Жас жеткіншектердің ұсынысын мақұлдаған облыс басшылығы халықаралық байқауға дайындауды облыстық білім басқармасына тапсырып, жаңа құрылғыны алып беруді қарастыратындықтарын айтып, өрендерді әр кез қолдауға дайын екендіктерін жеткізді.

Емен-жарқын кездесу соңында облыс әкімінің орынбасары Бақытжан Хаберұлы чемпионат жеңімпаздарына   алғысхат пен естелік сыйлықтар табыстады.

 

 
Бұл мақала туралы не ойлайсыз?
Жарнама
Соңғы жаңалықтар