Бүгін – Ұлт көсемі Әлихан Бөкейханның туған күні. Назарларыңызға Алаш арысының қанатты сөздерін ұсынамыз.
Tipi болсам, хан баласында қазақтың хақысы бар еді, қазаққа қызмет қылмай қоймаймын.
* * *
Біздің жұрт бостандық, теңдік, құрдастық, саясат ісін ұғынбаса, тарих жолында тезек теріп қалады.
* * *
Өз күшіне сенбеген адам да, халық та ешқашан өмір бәйгесін ала алмайды.
* * *
Елдің тұрмысын, тілін, мінезін білмеген кісі — көш басын да алып жүре алмайды.
* * *
Ұлтына, жұртына қызмет ету - білімнен емес, мінезден.
* * *
Жұрт пайдасына таза жолмен тура бастайтын ер табылса, қазақ халқы оның соңынан ерер еді.
* * *
Бұл заманда жылап мұратқа жетем деу — аш түйенің күйсеуі сыңды дәрменсіздік.
* * *
Ақыл да, ұсталық та оқумен, істеумен жүре ұлғаяды.
* * *
Ғұмыр бәйгесінде біздің қазақ тілі өз бәйгесін алар!
* * *
Байлық түбі — ақыл һәм қол ұсталығы. Осы екеуі қосылмай адам баласы қазынаға жарымайды.
* * *
Кім шебер болса, жалықпай талмай ізденсе, бірігіп — тізе қосып әдіс қылса — ғұмыр бәйгесі сонікі. Қазақ тып-тыныш жатып, еріншек, еш нәрсе қылмайды деп ойламаңдар! Олар қайратты, жұмыстың бәріне жарайды. Бірақ оларды қозғау керек!
* * *
Жанайқай: қазақтың оқыған азаматтары, қазаққа осындайда қызмет етпегенде қашан қызмет етіп пайдамызды тигіземіз?!
* * *
Бостандыққа апаратын жалғыз жол – ынтымақ қана. Қазақ жерінің әрбір түйір тасы әр қазақтың өңіріне түйме болып қадалуы керек.
* * *
Қазақ-ау! Түзуің бірігіп жұрт үшін қам ойлайтын кез келген жоқ па?!
* * *
Жұртқа әділ би пайдалы, көпке сүйенген, көп сөзін тындаған, билігін орнына жұмсайтын, арам жемейтін, іс білетін, ел мүддесін ашық қорғай алатын болыс пайдалы.
* * *
Әділдік жоқ жұртта береке-бірлік болмайды, байлықты өнермен, шаруамен, қызметпен іздемей, жұртты тонап, момынды жылатып іздеген мырзалар - қысты күні үңгірде жатып өз аяғын өзі сорған аю тәрізді.
* * *
Әр ұрпақ өзіне артылған жүкті жетер жеріне апарып тастағаны дұрыс, әйтпегенде болашақ ұрпағымызға аса көп жүк қалдырып кетеміз. Кейінгі ұрпаққа не алғыс, не қарғыс беретін алдымызда зор шарттар бар.
* * *
Бұл болып тұрған заман - Алаштың азаматына зор жүк.
Alash.kz ұлттық порталы
